Falanqeynta Iyo Sookoobidda Buugga: The Let Them Theory

Qorayaasha: Mel Robbins & Sawyer Robbins
Nooca: Isbeddelka Nafta / Kobcinta Shaqsiyadda
Sanadka La Daabacay: 2024
Tirada Bogagga: 325

The Let Them Theory wuxuu soo bandhigayaa fikrad sahlan balse awood leh: marka dadku u dhaqmaan si kaa xanaajisa, ku niyad jebisa, ama ku wareerisa — kaliya “u ogolow.” Fikraddan oo ay hormuud ka tahay Mel Robbins, isla markaana ay wada qoreen iyada iyo gabadheeda Sawyer Robbins, waxay ku dhiirrigelinaysaa akhristuhu in uu iska daayo damaca uu ku xakameynayo dadka kale, oo uu xooga saaro xasilloonidiisa iyo is-ixtiraamkiisa.

Muxuu ku wanaagsan yahay ama liitaa buuggu?

Mid ka mid ah waxyaabaha ugu xoogga badan ee buuggan waa fududaantiisa iyo la-qabsigiisa. Robbins waxay u qortay si sheeko ahaan ah, oo fudud, taasoo ka dhigaysa fikraddaha cilmi-nafsiga adag kuwo la fahmi karo. Fikradda "u ogolow" waa mid ku habboon xilligan ay dad badan la daalaa dhacayaan xidhiidhada adag, cadaadiska shaqo, ama rabitaanka dadka lagu raaligeliyo.

Buuggu wuxuu xambaarsan yahay qisooyin dhab ah oo laga soo xigtay nolol maalmeedka, gaar ahaan qaybaha ay ka hadleyso Sawyer Robbins, taasoo kordhinaysa fahamka dhallinyarada iyo dadka da'da yar. Waxa kale oo aad loogu amaani karo buuggan sida uu cilmi-nafsi, khibrad shaqsi, iyo talooyin wax-ku-ool ah isugu daray si uu u muujiyo sida "u ogolow" ay u noqoto furaha xasilloonida nafta.

Sidoo kale, buuggu wuxuu si cad u tilmaamayaa meelaha kala duwan ee nolol maalmeedka ee laga hirgelin karo aragtidan: sida xidhiidhka lamaanaha, asxaabta, qoyska, ama goobaha shaqada.

In kasta oo fikradda buuggu tahay mid saameyn leh, haddana waxaa jira dhaliilo laga tibaaxi karo, gaar ahaan dhinaca qoto dheeraanta. Fikradda “u ogolow” mararka qaar waxay ula muuqan kartaa in lagu fududeeyay xaalado adag, gaar ahaan marka ay jirto dhibaatooyin la xidhiidha dulmi, awood-sinaan, ama nidaamyo cadaalad darro ah. Qorayaashu way tilmaameen arrintan balse ma aysan siinin faahfaahin ku filan.

Sidoo kale, akhristayaasha raadinaya talaabo-tallaabo cad oo lagu dabaqo noloshooda waxay dareemi karaan in buuggu yahay mid dhiirrigelin ah intii uu noqon lahaa hagitaan nidaam oo dhameystiran. Waxa uu xoogga saarayaa garashada, balse wuxuu yara daciif yahay marka laga eego hirgelinta ficil ahaan.

Dhaliisha kale waa isku-celcelinta farriinta buugga. Inkasta oo tan laga yaabo inay xasuusin u tahay akhristaha, haddana akhriska buugga qaybihiisa dambe wuxuu noqon karaa mid ku celcelinaya isla aragti hore.

Halkan hoose waxaynu ku wadaagaynaa 10 cashar oo muhiim ah oo laga baran karo buugga The Let Them Theory ee ay qoreen Mel Robbins iyo Sawyer Robbins:

1. Dadka uma baahnid inaad xakameyso — u ogolow waxay doonaan ha sameeyaan.

Casharka ugu weyn ee buuggu bixiyo waa inaad iska joojiso isku dayga inaad wax ka beddesho ama xakameyso dadka kale. Tani waxay kuu sahlaysaa inaad nasato, degganaato, kana fogaato niyad-jab joogto ah.

2. Markaad "u ogolaato," waxaad helaysaa xorriyad shucuureed (emotional freedom).

Marka aad joojiso falcelinta iyo la-dagaalanka waxa dadka kale sameeyaan, waxaad si dhab ah u dareemaysaa xorriyad nafeed iyo farxad.

3. Dadka marka ay kuu muujinayaan dabeecadooda, ha dafirsan  la qabo runta.

Buuggu wuxuu barayaa in dadka marka ay na tusaan waxay dhab ahaan yihiin, aynaan iska indhatirin. Halkii laga sixi lahaa, waa in la aqbalo xaqiiqda.

4. Xuduudaha caafimaadka qaba waa dariiqa is-ixtiraamka.

“U ogolow” micnaheedu maaha inaad ogolaato dhibaato, balse waa inaad dejiso xuduudo adigoo aan murmin. Waa awood ku saleysan degganaansho.

5. Ma aha wax kasta oo dhacaya in laga falceliyo.

Cashar muhiim ah oo buuggu bixinayo waxa kamid ah: Qaar badan oo ka mid ah dhibaatooyinka nolosha waa laga aamusi karaa**.** Aamusnaanta waa awood.

6. Caddaalad ma aha inaad dadka kale farxad u raadiso adigoo naftaada luminaya.

Buuggu wuxuu iftiiminayaa halista dadka ku dadaala raalli-gelinta dadka kale. Marka aad dadka "u ogolaatid" inay fikirkooda yeeshaan, waxaad badbaadinaysaa naftaada.

7. Qof kasta dhibaatooyinka noloshiisa ha maareeyo.

Waa in aanad isku dayin inaad xaliso mushkiladaha qof kasta. "U ogolow" dadka inay wajahaan mas'uuliyadda noloshooda.

8. Dagaal kasta ma istaahilo inaad gasho.

Casharkan wuxuu xasuusinayaa in muran iyo is-marin habaabin la’aan ay jirto. Mararka qaar waa in aad dhaqaaqo adigoo aamusan.

9. Marka aad is-jeceshahay, dadka aan ku ixtiraameyn si sahlan ayaad uga tagtaa.

Buuggu wuxuu barayaa in qiimaha naftaada uu yahay furaha go'aan qaadashada wanaagsan. Qofka is-jecel si fududbuu u yareeyaa dadka waxyeelleeya.

10. Xasilloonida gudaha waa mid laga shaqeysto, lamasugasn weeyaan.

Ugu dambayn, buuggu wuxuu dhiirrigelinayaa in farxaddaada iyo xasilloonidaada aysan ku xirnayn dadka kale, balse ku xidhantahay doorashada aad maalinkasta samayso — “u ogolow” dadka inay yihiin cidda ay yihiin.

Ugu danbayn:

The Let Them Theory waa buug ku habboon qof kasta oo u baahan inuu xakameeyo noloshiisa, joojiyo cadaadiska dadka kale, una jeesto xasillooni iyo is-ixtiraam. Inkasta oo aanu bixin dhammaan xalalka, haddana wuxuu si dhab ah u beddeli karaa habka aad u wajahayso dadka iyo dunida kugu xeeran.

Waa buug aad ugu habboon dadka haysta xidhiidho adag, hogaamiyeyaasha u baahan xuduudo caafimaad qaba, ama qof kasta oo raadinaya farxad iyo degganaansho.

Guuleyso!  

Xuquuqda Qoraalku, waxa ay u dhowrsantahay #Somalijobs INC.     

Lama ogola idan la'aan (Ogolaansho la’aan) in la qaato. Wixii codsi ah fadlan la xidhiidh [email protected]      

Tixgelin.

--------------------------------------------------    

Lasoo deg APPka Somalijobs (Download Somalijobs APP)

Android/Samsung: https://play.google.com/store/apps/details?id=com.tiriig.somalijobs    

(IOS/Iphones): https://apps.apple.com/gb/app/somali-jobs/id6443817164