Qandaraas!

Qandaraas waa heshiis sharci ah oo laba dhinac ama ka badan ay ku kala heshiiyaan inay qaadaan ama bixiyaan adeegyo, alaab, ama faa’iidooyin, iyadoo la raacayo shuruudo gaar ah. Heshiiskan waxaa lagu qeexaa waajibaadka iyo xuquuqda labada dhinac, waxaana badanaa loo isticmaalaa ganacsiga, adeegyada dadweynaha, iyo mashruucyada hay’addaha iyo kuwa dowliga ah.

Waxaa jira noocyo kala duwan oo qandaraasyo ah, sida:

• Qandaraaska adeegga (Service Contract): Hal dhinac wuxuu fulinayaa adeeg u gaar ah.
• Qandaraaska iibka (Sale Contract): Hal dhinac wuxuu bixinayaa badeeco, dhinaca kalena wuxuu bixinayaa lacagta.
• Qandaraaska dhismaha (Construction Contract): Shirkad ayaa fulineysa mashruuc dhisme ah.
• Iyo qaar badan oo kale.

Yaa Qaata Qandaraaska?

Qandaraaska waxaa qaata dhinac ama shirkad loo aqoonsaday inay awood u leedahay fulinta adeeg ama mashruuc loo baahday. Qandaraas-layaasha (contractors) waxay noqon karaan:

1.     Shirkado gaar loo leeyahay (Private Companies): Shirkadaha ayaa mararka qaar qandaraas ka qaata dowladaha ama hay’adaha kale si ay u fuliyaan adeegyo ama mashruucyo gaar ah.

2.     Hay’addaha dowladda (Government Agencies): Dowladdaha ayaa sidoo kale qaata qandaraasyo, gaar ahaan kuwa ka dhexeeya dowlado kale ama hay’ado caalami ah.

3.     Shakhsiyaad:

o    Shaqsiyaadka aqoonta gaarka ah u leh adeegyada la dalbado waxay qaadan karaan qandaraasyo shaqo ama adeegyo gaar ah.

Shuruuddaha Qandaraaska

Shuruuddaha qandaraaska waa qodobbada sharciyaysan ee labada dhinac ay isku waafaqaan. Qaar ka mid ah shuruuddaha guud ee qandaraaska waxaa ka mid noqon kara:

1.     Qodobbada adeegga: Waxyaabaha la rabo in la fuliyo (tusaale adeeg, mashruuc, ama badeeco) waa in si faahfaahsan loogu qeexaa.

2.     Muddada qandaraaska: Waqtiga loo qorsheeyay inuu qandaraasku socdo ama la dhammaystiro.

3.     Lacagta iyo habka lacag bixinta: Qiimaha loo qoondeeyay qandaraaska iyo sida iyo goorta lacagta la bixinayo (marka la dhammeeyo shaqada, si joogto ah, iwm).

4.     Shuruuddaha shaqada iyo tayada: Waa in shaqadu ka dhacdo heer tayada ku habboon ee la isla gartay.

5.     Xilliga waqti-labaad (Deadlines): Waqtiga kama dambaysta ah ee shaqada ama mashruucu lagu soo dhammeeyo.

6.     Shuruuddaha joojinta (Termination Clauses): Waxay qeexaan xaaladdaha qandaraaska lagu joojin karo, iyo waxa dhaca haddii mid ka mid ah dhinacyadu u hoggaansami waayaan shuruuddaha.

Habka (Criteria) loogu kala saaro qandaraas layaasha

Marka la xusho qof ama shirkad qaadaneysa qandaraaska, waxaa jira habab ama criteria si loogu kala saaro oo looga doorto cidda ku habboon mashruuca. Hababkaas waxaa ka mid ah:

1.     Awoodda iyo khibradda:

o    Shirkadda ama shaqsiga waa in ay soo bandhigaan khibrad ku filan iyo waayo-aragnimo la xidhiidha qandaraaska. Inta badan, shirkaddaha leh khibrad dhisme, adeeg ama badeeco gaar ah ayaa laga doorbidaa kuwa kale.

2.     Awood dhaqaale:

o    Waa in shirkaddu leedahay awood dhaqaale oo ay ku fuliso qandaraaska. Tani waxaa ka mid ah kartida inay bixiso kharashaadka mashruuca, wax-soo-saarka, iyo shaqaalaha ka qayb qaadanaya.

3.     Waqti-bixinta (Timeliness):

o    Awoodda shirkadda inay fuliso shaqada wakhtiga loo asteeyay ama ka hor. Shirkaddaha si hufan mashruucyada u dhammeeya oo waqtiga dhowra ayaa inta badan fursad fiican hela.

4.     Qiimaha iyo miisaaniyadda (Cost-Effectiveness):

o    Waa in shirkaddu bixisaa hindise dhaqaale oo macquul ah oo ku habboon miisaaniyadda mashruuca. Shirkadaha soo bandhiga qiimo tartan leh oo tayo wanaagsan leh ayaa inta badan loo xushaa qandaraasyada.

5.     Shuruuddaha farsamada iyo tayada (Technical Expertise and Quality):

o    Waa in shirkaddu leedahay aqoon farsamo iyo karti si ay ugu soo bandhigto badeecada ama adeegga tayada sare leh, sida farsamooyinka dhismaha, qalabka casriga ah, iyo xallinta dhibaatooyinka farsamo.

6.     Shuruuddaha sharciga iyo tayada (Legal and Compliance):

o    Waa in shirkaddu buuxiso dhammaan shuruudaha sharci ee looga baahan yahay fulinta qandaraaska, sida ruqsaddaha, shatiyada, iyo sharciyada kale ee la xidhiidha shaqada.

7.     Tixraacayaasha (References):

o    Shirkadduhu inta badan waxay soo bandhigaan tixraacyo oo muujinaya shaqooyinkii hore iyo macaamiishii hore ee ku qanacsanaa shaqadooda. Shirkaddaha leh tixraacyo wanaagsan ayaa laga door bidaa kuwa kale.

Guuleyso!    

Xuquuqda Qoraalku, waxa ay u dhowrsantahay #Somalijobs INC.     

Lama ogola idan la'aan (Ogolaansho la’aan) in la qaato. Wixii codsi ah fadlan la xidhiidh [email protected]      

Tixgelin.

--------------------------------------------------    

Lasoo deg APPka Somalijobs (Download Somalijobs APP)    

Android/Samsung: https://play.google.com/store/apps/details?id=com.tiriig.somalijobs    

(IOS/Iphones): https://apps.apple.com/gb/app/somali-jobs/id6443817164