Xirfadda Wadaxaajoodka (negotiation)!

Xirfadda wadaxaajoodku waa hab ay dadka iyo ururradu ku gaadhaan isfaham iyo heshiisyo si ay uga faa'iidaan danaha wadajirka ah ee labada dhinac. Waa xirfad muhiim u ah nolosha shaqo, xidhiidhada bulshada, iyo maamulidda khilaafaadka. Wadahadalku wuxuu leeyahay doorka hagidda go'aannada istaraatiijiga ah, gaar ahaan xilliyada loo baahan yahay in la helo tanaasul iyo xal waara.

Maqaalkan wuxuu kaga hadli doonnaa xirfadda wadahadalka dhinacyo badan oo ay ka mid yihiin Islaamka iyo wadahadalka, muhiimaddiisa, xirfadaha lagama maarmaanka ah, suuqyada shaqada, horumarka shaqsiga, iyo shaqooyinka mustaqbalka ee kaalinta xirfadda wadaxaajoodka.

Diinta Islaamku waxay dhiirrigelinaysaa isfahan iyo tanaasul si looga hortago muranka iyo khilaafaadka. Islaamka waxaa uu boorinayaa oo uu ammaanay heshiisyada caddaaladda ku dhisan iyo hababka hufan ee wax lagu xalliyo.

Xirfadda wadahadalka ayaa faa'ido badan u leh xirfadlayaasha iyo hogaamiyeyaasha ganacsiga, gaar ahaan marka la maareynayo khilaafaadka ama la dejinayo qorsheyaal. Qodobada muhiimka ah ee xirfaddu leedahay waxaa ka mid ah:

1.     Horumarinta maamulka iyo hogaaminta: Hoggaamiye wanaagsan wuxuu khilaafaadka u rogi karaa fursado, isaga oo hubinaya in la gaadho heshiisyo dheelitiran kaas oo dhinac kasta si hufan u qancin kara.

2.     Dhisidda xidhiidho waara: Xirfaddaha wadaxaajoodka ayaa yareyn kara is-faham la’aanta oo dhisi karta kalsooni buuxda.

3.     Go'aamada istiraatiijiga ah: Wadahadalku wuxuu hubiyaa in dhinacyada oo dhan ay ka faa'idaan heshiisyada, taas oo keeneysa guul wadajir ah (win-win situation).

Xirfadaha lagama maarmaanka ah ee loo baahan yahay si wadaxaajood loogu guuleysto waxaa ka mid ah:

1.     Dhegeysi wax ku ool ah: Fahamka danta dhinaca kale waa tallaabada ugu horreysa ee heshiis wanaagsan. Cidda hoggaanka ahna waxa ku waajiba inuu daneeyayaasha si tixgelin leh u dhegaysto doodohooga iyo qodobada ay u cuskanayaa xallinta arrimaha taagan.

2.     Diyaargarow iyo falanqeyn: Fahamka arrimaha la isku hayo iyo go’aamada suurtogalka ah waa muhiim. Siiba eegista bandhigga dhinacyada arrimuhu khuseeyaan si loo gaadho xal wax ku ool ah.

3.     Xakamaynta shucuurta: In la yareeyo xanaaqa iyo cadaadiska inta lagu jiro wadahadalka waxay muhiim u tahay in xaaladda aan la sii adkeyn. Dhanka kale in hoggaamiyaha shaqadani saameynaysaa ka fogaado ku milanka dareennada iyo caadifadda dhinaca uu metelayo iyo adeeg ama alaab kireeyaha, iibiyaha ama adeeg bixiyaha.

4.     Istusid iyo qancin: Waa in si xikmad iyo degganaan leh loo sharxo danahaaga si dhinaca kale uu uga dhaadhaco. Adigoo cuskanaya qodobo maangal ah oo aan kaligaa kuu adeegayn

5.     Tanaasul caqligal ah: Mararka qaar waa in la ogolaado tanaasul si loo gaadho xal waara inta aanay arrimuhu sii adkaan ama aanay faraha ka bixin.

Suuqyada shaqadu waxay si gaar ah ugu baahan yihiin xirfaddaha wadaxaajoodka. Wadahadallada shaqo ee la xidhiidha mushaharka, shuruudaha shaqada, iyo fursadaha horumarineed waxay ka mid yihiin xaaladdaha u baahan xirfad wada-xaajood. Shaqaalaha xirfad wadaxaajood lehi waxay heli karaan:

• Mushahar iyo faa'idooyin wanaagsan: Wadahadallo hufan ayaa shaqaalaha siin kara fursado ka wanaagsan kuwa caadiga ah.
• Shuruudo shaqo oo dabacsan: Xirfaddaha wadaxaajoodku waxay ka caawiyaan shaqaalaha inay helaan saacado shaqo oo dabacsan iyo xaalado shaqo oo habboon.

Shirkaduhuna waxay u baahan yihiin wadaxaajood si ay ula soo xidhiidhaan macaamiil cusub, heshiisyo muhiim ah u saxiixaan, iyo inay qanciyaan shaqaalaha xirfadda leh si ayna uga tagin.

Xirfadda wadaxaajoodku waxay kor u qaaddaa horumarka shaqsiga, iyada oo gacan ka geysanaysa horumarinta xirfadaha kale:

1.     Xidhiidhka wanaagsan: Wadahadalka hufan wuxuu wanaajiyaa xidhiidhada qoyska, saaxiibada, iyo asxaabta shaqada.

2.     Kobcinta xirfaddaha hoggaamineed: Shakhsiyaadka si wanaagsan u yaqaan sida loo wadaxaajoodo waxay ku kasbadaan kalsooni iyo tixgelin bulshada dhexdeeda.

3.     Horumarinta kalsoonida nafta: Wadaxaajoodka guuleysta wuxuu kobciyaa kalsoonida iyo awoodda qofka ee maaraynta xaaladaha adag.

Shaqooyinka mustaqbalka, gaar ahaan kuwa la xidhiidha teknoolojiyada iyo ganacsiga caalamiga ah, waxay u baahan doonaan xirfado heer sare ah oo wadaxaajood:

1.     Ganacsiyada caalamiga ah: Wadahadalka dhaqamo kala duwan ayaa muhiim noqon doona, taasoo sii xoojinaysa muhiimadda fahamka dhaqanka iyo hab-dhaqanka kala duwan ee bulshooyinka ganacsigu dhex marayo.

2.     Xallinta khilaafaadka cusub: Shirkaddaha iyo dowladdaha caalamiga ah waxay la kulmi doonaan khilaafaad cusub oo u baahan xalal hal abuur leh.

3.     Dib-u-heshiisiin siyaasadeed iyo ganacsi: Xirfaddaha dib-u-heshiisiin ayaa loo baahan doonaa si loo xalliyo khilaafaadka caalamiga ah ee soo kordha.

Xirfadda wadaxaajoodku waa mid muhiim ah oo wax ku ool ah dhammaan dhinacyada nolosha. Islaamku wuxuu barayaa in khilaafaadka lagu xalliyo si nabad iyo caddaalad leh. Suuqyada shaqada iyo shaqooyinka mustaqbalka waxay sii kordhinayaan baahida loo qabo xirfado wadaxaajood oo heer sare ah. Shaqsiyaadka iyo ururrada aqoonta u leh sida loo maareeyo khilaafaadka iyo heshiisyada waxay heli doonaan fursado badan oo ay ku horumaraan.

Si loo guuleysto, waxaa muhiim ah in la hormariyo xirfaddaha sida dhegeysiga, falanqaynta, qancinta, iyo tanaasulka caqli-galka ah. Xirfaddan waxay sii noqon doontaa tiir muhiim ah oo lagu gaadhi karo guulo waara oo nololeed iyo xirfadeed.

Guuleyso!    

Xuquuqda Qoraalku, waxa ay u dhowrsantahay #Somalijobs INC.     

Lama ogola idan la'aan (Ogolaansho la’aan) in la qaato. Wixii codsi ah fadlan la xidhiidh [email protected]      

Tixgelin.

--------------------------------------------------    

Lasoo deg APPka Somalijobs (Download Somalijobs APP)    

Android/Samsung: https://play.google.com/store/apps/details?id=com.tiriig.somalijobs    

(IOS/Iphones): https://apps.apple.com/gb/app/somali-jobs/id6443817164