Barashada Joogtada Ah!

“U fiirsada cilmiga, waayo cilmigu waa iftiinka wadada nolosha." – Imaam Shafici

Barashada joogtada ahi waa hab fikir iyo hab dhaqan qofka u oggolaanaya in uu si joogto ah wax u barto una horumariyo xirfaddiisa nololeed iyo shaqo. Sida aristotle uu sheegay, "waxbarashadu waa gantaal lagugu rido, waxbarashada joogtada ahna waa shidaalka kugu haya socodka." taasi waxay muujinaysaa in barashada joogtada ahi ay tahay furaha horumarka shaqsi iyo bulsho ahaanba. Sida uu tibaaxay Peter Drucker,’’ Dhaqaalaha mustaqbalka waxaa xukumi doona kuwa sii wada barashada, ee ma aha kuwa joojiyay." 

1. Xirfaddaha barashada joogtada ah

Si qofku ugu guuleysto barashada nolosha oo dhan, waa inuu yeesho xirfaddo muhiim ah oo ka caawinaya inuu si waara wax u barto. Xirfaddaha lagama maarmaanka u ah barashada joogtada ah waxaa ka mid ah:

• Xirfadda isbaridda: Kartida aad isku hagto, aad u qorsheysato waxbarashadaada.
• Xirfadda xalinta dhibaatooyinka: Awoodda aad ku ogaan karto xalal cusub iyo in aad la jaanqaadi karto xaalado cusub.
• Xirfadda la-qabsiga (adaptability): In aad si fudud ula qabsato isbedbedelka nololeed iyo shaqo. Sida uu Henry Ford yidhi, "qof kasta oo joojiya inuu wax barto, wuu duqoobayaa – xitaa haddii uu 20 jir yahay. Qof kasta oo sii wata barashada, wuu yar yahay xitaa haddii uu 80 jir yahay."
• Xirfadda fikirka hal-abuurka iyo curinta (creativity & innovation): In aad si cusub u fikirto, u hal-abuurto, ugana faa’idaysato fursaddaha kusoo maraya.
• Xirfadda isgaadhsiinta/wada-xidhiidhka (communication skills): Awoodda aad si wax ku ool ah dadka ula xidhiidhi karto.
• Xirfadda cilmibaadhista iyo raadinta macluumaadka: In aad cilmi raadiso oo aad si sax ah u fahanto xogta aad hesho. Sida Einstein uu yidhi, "aqoontu waa sida jidhka: haddii aadan isticmaalin, way daciifaysaa."

2. Istaraatiijiyadda barashada joogtada ah

Istaraatiijiyadda barashada nolosha waa qorshe qof ama urur si istiraatiiji ah u dejiyo si uu u horumariyo xirfaddahooga ama aqoontooda. Qodobbada ugu muhiimsan waxaa ka mid ah:

• Hadafyo cad: qofku waa inuu leeyahay hadaf cad oo ku saabsan waxa uu rabo inuu barto. Tusaale, Ganacsiga rarista alaabaha iyo cashuuraha.
• Jadwal joogto ah: waa in uu si joogto ah ugu tababarto barashada iyo horumarinta xirfadiisa. Tusaale, Bilkasta hal tababar ayaan ka qayb gelayaa ama 20 daqiiqo ayaan akhrinayaa buug kusaabsan mawduucaa sare ee aan xushay.
• Isticmaalka teknolojiyadda: Barashada fogaan aragga ah, akhriska buugaagta, daawashada muxaadarooyinka, iwm.
• La xidhiidhida khubaro iyo lataliyeyaal (mentorship & networking): Ka faa'idaysiga dadka aqoonta u leh xirfadda aad horumarinayso.
• Dib-u-eegis (reflection & improvement): In si joogto ah dib loogu eego horumarka, lana sameeyo hagaajin joogto ah.

3. Khariidadda barashada joogtada ah 

Haddii aad maalintii 10 daqiiqo ku bixiso inaad kobciso hal xirfad. Muddo shan sanno kadib ah waxaad ku noqon khabiir loodaba fadhiisto xirfaddaa. Khariidadani waa qorshe lagu jaangooyo barashada joogtada ah, waxaana ay ka koobnaan kartaa:

• Sannad-1aad: Aqoonsiga waxa aad rabto inaad barato iyo dejinta hadafyada. 
• Sannad-2aad: Barashada aasaaska iyo xirfadaha salka u ah. 
• Sannad-3aad: Sameynta tababarro iyo ficil u beddelidda aqoonta. 
• Sannad-4aad: La xidhiidhidda khubaro, ka qeybgalka kulan aqooneedyada. 
• Sannad-5aad: Dib u eegis iyo qiimeyn joogto ah si loo horumariyo..

Sida uu Bill Gates yidhi, "Aqoon raadintu ma laha xilli dhamaad ah, waa nolol dhan."

Cilmi-baadhisyada ku saabsan barashada nolosha waxay tilmaamayaan in:

• Barashada joogtada ah ay kor u qaaddo hal-abuurka iyo wax-soosaarka shaqaalaha.
• Xirfaddaha la barto inta lagu jiro nolosha ay sare u qaadaan koboca qofeed iyo dhaqaale. 
• Dadku ay u baahan yihiin in ay la jaanqaadaan isbeddelka teknoolojiyada iyo suuqa shaqada.
• Dalalka horumaray waxay diiradda saaraan waxbarashada joogtada ah si ay u xoojiyaan awoodda tartanka.

Reer Afrika waxay ku maahmaahaan, "Ilmaha aan la barin maanta, waa hoggaanka liita ee berri."

Barashada joogtada ahi waa fure muhiim ah oo qof kasta ku hagi kara horumar nololeed iyo shaqo. Waa in aynu si joogto ah u horumarinno xirfaddaha waxbarasho, u dejino istaraatiijiyad cad, ugana faa’idaysanno farsamooyinka casriga ah ee waxbarashada. Sida Charlie Munger uu yidhi: "ma ahan inaad noqoto mid caqli badan oo fadhiista, balse waa inaad noqotaa mid barashada jecel oo joogteeya."

Guuleyso!  

Xuquuqda Qoraalku, waxa ay u dhowrsantahay #Somalijobs INC.     

Lama ogola idan la'aan (Ogolaansho la’aan) in la qaato. Wixii codsi ah fadlan la xidhiidh [email protected]      

Tixgelin.

--------------------------------------------------    

Lasoo deg APPka Somalijobs (Download Somalijobs APP)

Android/Samsung: https://play.google.com/store/apps/details?id=com.tiriig.somalijobs    

(IOS/Iphones): https://apps.apple.com/gb/app/somali-jobs/id6443817164